[جديد] تجربتي مع أنيميا الفول والجيش المصري - الطريق للأعفا خطوة بخطوة

في المقالة دي بحكي تجربتي مع مرض انيميا الفول او favism وتقديم الجيش والي حصل معايا بالترتيب والحمد لله لحد اعفائي من الخدمة العسكرية واني اخد اعفا واستلامي للشهادة .اسالة كتير كانت بتيجي فبالي وانا بقدم عالجيش منكرش ان مكانتش فارقة معايا ادخل او اطلع بس الحمد لله ربنا اراد وخرجت 

انيميا الفول و الجيش - أنيميا الفول والجيش  - نسبة أنيميا الفول للخروج من الجيش

علشان تتضح لك الامور اكثر وتبقي فاهم،انا كنت عامل تحليل قبل التقديم ب 3 اشهر ودا كان بسبب اني تعبت فجأة واطلب مني تحليل لانيميا الفول فبسببها عرفت النسبة كام 

النسبة في التحليل دا كانت: 0.9  u/g Hb

المجال الرجعي (النسبة الطبيعية) للمعمل : 4.6 - 13.5 

كدا عرفنا من نسبة التحليل اني اقل من الحد الادني فالعادي الي هوا 1 تقريبا من 4.6 ففي الحالة دي انا الانيميا عندي عالية شوية ،مع العلم مفرقتش عن وانا عندي سنتين الا ب 0.3 يعني خروجها بعيد ، طيب حد هيسأل سؤال طبيعي وجه فبالي كتير 

نسبة أنيميا الفول للخروج من الجيش كام ؟

النسبة الادني 12 والاعلي 20 ودي نسبه مختلفة كليا عن معامل برا بتختلف من معمل لمعمل بسبب الاجهزة وان كانت حديث ولا قديمة وهكذا مش موضوعنا 

هل انيميا الفول بتخرج من الجيش ؟

ايوا بتخرجك ،وخير مثال انا اهو واخد اعفا نهائي ،والي حد علمي انك لو اقل من الحد الادني الي هو نسبة الجيش 12 هتطلع والي بالمناسبة بتساوي الحد الادني للمعامل الي برا ف متقلقش

انا كتبت بوست كبير ونشرته فالجروبات عالفيس علشان اقدر افيد بيه اكبر قدر ممكن من الناس علشان ميقلقوش القلق ويتعبوا التعب بتاعي فانا هنسخ البوست وهرتبه هنا تاني .

 انيميا الفول والجيش

انيميا الفول ليها مسميات كتير منها المعروف العادي وهو انيميا الفول والتفول وفافيزم او favism وعلميا بيقولوا تحليله g6pg فالجيش بقا بسموها فافيزم او g6pd لكن بتتكلم وبتوضح عادي كانيميا الفول

ملحوظة:  سيف المقالة او شيرها او اعمل اي حاجة فيه معلومات مهمة هتساعدك اوهتساعد حد بعدين،هتحتاجه صدقني.

اترددت كتير اني اكتب البوست دا بس لاحظت ناس كتير انيميا وابيض مش عارفين حاجة هحاول اجاوب علي كل الاسئلة او الاستفسارات فالبوست هنا

مبدئيا انا انيميا الفول والنسبة كانت 0.9 والحد الادني والاعلي لمعمل التحليل بتاعي كان 4.6 الي 13.5 واخدت اعفا الحمد لله 

خلاص انت انيميا فول من تجنيد محافظتك ولجنة عليا وهتسافر شوية نصايح :

•  تمم علي البطاقة بتاعتك كويس جدا ولازم تكون سارية 
•  110 بتاعتك تشيلها جوا عينك لان من غيرها هتتسوح هناك
•  الباركود لو معاك برضو متنساهوش (دا في حالة عطولك واحد)
•  اتاكد من انهم يختمولك جندي لو كنت مترشح ظابط ونزلت فالارجا وكمان ختم اللجنة العليا واهم حاجة يكون جنب اسمك فال 110 مكتوب لجنة عليا 
•  متتحركش غير لما تاخد معاد اللجنه العليا من التجنيد 

تممت وهتسافر ؟

شوف اي حد قريبك فالقاهرة وبيت عنده لانك هتروح يومين ورا بعض لمدة 3 اسابيع او 4
وتقريبا هيكونو الاتنين (حلمية الزيتون) والتلات مستشفي المعامل العسكرية في كوبري القبة

سافر قبلها بيوم وبيت عند حد تبعك علشان تبقي مرتاح ومهيئ للمشوار لانكم ممكن تطولوا شوية علشان العدد كبير حبه صغير وعلشان لو رحت بدري هتخلص بدري

لما تركب المترو اوعي ترمي التذكره من غيرها مش هتطلع من المترو الناحية التانية وهتدفع غرامة

اول ماتاخد الميعاد ومظبط عليه وهتروح خلاص هتروح علي الحلمية علطول وفكك من الي بيقولك روح كوبري القبة هتتسوح لانهم مبيتحركوش غير بعد الحلمية

هتنزل من مترو محطة حلمية الزيتون واسال العمال او اي حد فمحطة المترو عربيات التجنيد بتاعة حلمية الزيتون فين هتطلع من البوابة وهتركب عربية سوزوكي واساله وقولة (اللجنة العليا ) سعر النفر 4.5 او 5 مش فاكر

هينزلك تحت الكوبري وهيشاور لك علي بوابة التجنيد (لجنة عليا)

وصلت التجنيد ؟

لازم تكون حالق متقلش نفسك علشان العساكر هناك عملوا حوارات كتير مع ناس رايحه مش حالقة 

هتوري الي عالبوابة ورقة الميعاد وهتسلم فونك فالامانات والاجرائات الي كلنا عارفينها دي 

هتدخل تنتظر في المظلات هناك في عسكري اما هياخد الباركود او هيكون معاه كشف باسماء الناس ويندهم ركز فاسمك وفكك من الحكاوي وحاول تقعد قدام علشان تسمع الندائات لان في عساكر خلقهم ضيق مش بيندهوا غير مره واحدة بس

هيجمعوكم اعداد كدا وهتدخلوا جوا المبني واحد معاه ورقك بتاع التجنيد هيفضل ينده هتاخدوا الورق وهتقفوا طابور وهتدخلوا للدكتور قولة انيميا الفول وورية التحليل لو عامل قريب 

اتبع التعليمات بقا الي يقولها لك

التحليل : خلصت من الحلمية وهتروح تحلل (معامل كوبري القبه)

كوبري القبة وتحليل انيميا الفول في المعامل العسكرية ،المفروض امبارح فالحلمية لما بتخلص بيدوك ورقة صغيرة فيها نوع التحليل اتاكد انها مكتوب فيها انيميا الفول بالنص 

هتنزل محطة كوبري القبة واسال المستشفي العسكرية من انهي بوابة  واطلع من البوابة وامشي علطول لا تروح يمين ولا شمال هتلقي الطريق السريع فوشك 

لقيت سور المستشفي ف وشك اسال مجند تامين بيكون واقف فالشارع فين البوابة رقم 3 ودي بالمناسبة بوابة المعامل العسكرية 

هتدخل جوا وهتسيب الامانات وهيلزقوا لكم عليه ستيكر لو معاك ملف ،مش هتدخل غير بالبطاقة وورقة التحليل الي عطوهالك في الحلمية 

هياخدوا منكم البطايق وهينظموكم ويقسموكم مجموعات وبتوع انيميا الفول بيخلصوهم الاول متقلقش بس هتطلعوا كلكم مع بعض

داخلين مجموعة وطابور هتركز فاسمك كويس علشان بيكون في اسماء مشابهه وهتقولة بصوت عالي وهطلع صابعك وهتبصم قبال اسمك الاول

بعدها هتدخل علي ظابطة بتراجع ترتيبكم وبطايقكم تمم علي نفسك وهتدخل بعد كدا علي ظابطة تانية بتديك انبوبتين عينات قول اسمك كامل واتاكد منه بصوت عالي (حصلت مشكلة كانت هتسوحني بسبب الاسم) علشان كدا بقولك ركز

هتدخل منطقة فية كراسي بالترتيب والدور هتقعدوا والكورسي الي يفضي هتدخلوا عليه بالترتيب برضو علشان السريالات متتغيرش بتاعة العينات

بعدها هتروح للدكتورة او الدك هيربط الحذام علي دراعك وهياخد العينة ،متخافش ومتقلقش اديهم خفيفة وارخي نفسك متعصلقش علشان الدم يخرج

خلصت كدا هتطلعوا عادي وهتنتظروا برا لحد ما كلكم تخلصوا هيرتبوكم تاني وهيوزعوا البطايق وكل واحد هيبصم علي اسمة تاني 

وهيقولك روح وتعالا الحليمة الاسبوع الجاي فالمعاد الفلاني

انتهي موضوع كوبري القبة 

هتروحلهم لو بتدعي ومعندكش فعلا هيقولوا لائق ورجوع للمنطقة لو عندك هتروح تاني يوم للمعامل برضوا والسبوع الي بعده هتشوف النتيجه بغير لائق ان شاء الله او هيقولوا لك اطلع علي المعامل دلوقت

روحت الاسبوع التالت واعفا ان شاء الله : الـ 110 اوعي اوعي تنساها  لانها هتتاخد منك والبطاقة 

هتروح علي المظلات لحد ما يندهوا اسمك ويدخلوك للظابط وهيعلم عليك بالاحمر ويقولك ادخل الصالة رقم 2 او 3 مش فاكر ،هناك هتلقي واحد بيبصمك بالبصمة الحمرا قدام اسمك ،بعدها هيخلص المجموعه ويقولكم تعالوا علي اوضة البصة التانية (السودة) هتبصم وهتطلع علي المظلات برا

هيندهوا اسمك وهيديك كارت اخضر (غير لائق) مكتوب فيه اسمك وتاريخ الحضور لمنطقة تجنيد محافظتك.

الف مبروك الاعفا مقدما ياصديقي

اسألة هامة 

اكل فول قبل ما اروحلهم ؟

منصحكش لكذا سبب ممكن تتعب زي كام واحد عملوا كدا وقعدوا يرجعوا وحوار + الانيميا مش بتمشي ياصاحبي ف مش حوار يعني ومش بتتاثر التاثر الي هوا فالنسبة + ممكن تتسوح فاسبوع رابع بسبب حركة زي دي لان ممكن تحصل نتايج او تغيرات ف حجات تاني ممكن تستدعي يقعدوك اسبوع رابع (والله اعلم)

هدفع فلوس للتحليل ولو هدفع هدفع كام ؟

مش هتدفع قرش ولو حد قالك حاجة زي كدا اطلع علي مكان الشكاوي واسال واشتكي بس محدش هيقدر يقولك حاجة اصلا ولا هات فلوس

النسبة بتاعة تحليل الانيميا كام فالحلمية ؟

الحد الادني 12 والحد الاعلي 20 ، نسبتي كانت 2.15 فالتحليل الاولاني و 1.75 فالتحليل التاني مش عارف سبب تغير النسبة اية الصراحه مع اني مكلتش اي حاجة ممنوع عنها ففترة التحليل الاول والتاني

مش عارف بالظبط بس اغلب الي كانوا بيبصموا معايا فحجرة الغير لائق كانوا تحت ال 12 (علي حد علمي لاننا كلنا كنا تحت ال 12 واغلب الي سالتهم كدا )

وكذالك الي تحت النسبة الادني فالتحاليل الخارجية برضو للطمانينة

بالتوفيق للجميع ان شاء الله واتمني ليكم الاعفاء جميعا ، ممكن الاجرائات تكون اتغيرت شوية لكن هتفضل بنفس البنية الخاصة بالخطوات ان شاء الله.

 مقالات قد تهمك : 

• قائمة بالاطعمة والمنتجات والأكلات الممنوعة عن مرضي انيميا الفول g6pd
• [pdf] ورقة الادوية والمواد الكيميائية الممنوعه عن مرضي انيميا الفول للعرض علي الاطباء